ជនសង្ស័យ២នាក់ ត្រូវបានកម្លាំងនគរបាលឃាត់ខ្លួនពាក់ព័ន្ធករណី បើកនិងលេងល្បែងស៊ីសងខុសច្បាប់
04-February-2020 | ដោយ ពលមនសិការ
កំពង់ចាម៖ ជនសង្ស័យ២នាក់ ត្រូវបានកម្លាំងនគរបាលឃាត់ខ្លួនពាក់ព័ន្ធករណី បើកនិងលេងល្បែងស៊ីសងខុសច្បាប់ (លក់ឆ្នោតវៀតណាម) នៅចំណុចផ្ទះរបស់ឈ្មោះ ណុច ឡូត ស្ថិតនៅភូមិបឹងត្រាវ ឃុំសូរគង ស្រុកកងមាស ខេត្តកំពង់ចាម នៅថ្ងៃទី០៣ ខែកុម្ភៈ ឆ្នាំ២០១៩ វេលាម៉ោង១៥ និង៣០នាទី។
លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានឱ្យដឹងថាបន្ទាប់ពីទទួលបានព័ត៌មានពីប្រជាពលរដ្ឋភ្លាម លោកបានបញ្ជាដល់កម្លាំងជំនាញរបស់ផែនការងារនគរបាលព្រហ្មទណ្ឌ សហការជាមួយកម្លាំងជំនាញអធិការដ្ឋាន នគរបាលស្រុកកងមាស ដឹកនាំដោយលោកវរសេនីយ៍ឯក ថាញ់ សុខវុន នាយការិយាល័យនគរបាលព្រហ្មទណ្ឌកម្រិតស្រាល ទៅបង្ក្រាបករណីលើភ្លាមៗ។
ជនសង្ស័យទាំង២នាក់រួមមានទី១-ឈ្មោះ ស៊ី ប្រូ ភេទប្រុស អាយុ៤៦ឆ្នាំ ជាតិខ្មែរ មានទីលំនៅភូមិអន្លុងអក ឃុំសូគង ស្រុកកងមាស ខេត្តកំពង់ចាម ទី២-ឈ្មោះ ណុច សុខហ៊ន់ ភេទស្រី អាយុ៤៧ឆ្នាំ ជាតិខ្មែរ មានទីលំនៅភូមិបឹងត្រាវ ឃុំសូគង ស្រុកកងមាស ខេត្តកំពង់ចាម។
ដកហូតវត្ថុតាងមួយចំនួនរួមមាន៖១-ក្រដាស់កត់កន្ទុយលេខឆ្នោត ចំនួន៥៥សន្លឹក, ២-សៀវភៅកត់លេខឆ្នោត ចំនួន០១ក្បាល, ៣-ទូរស័ព្ទដៃចំនួន០៣គ្រឿង, ៤-ប្រាក់រៀលចំនួន១០០០០០០រៀល (មួយលានរៀល)។
បច្ចុប្បន្ន ជនសង្ស័យរួមនឹងវត្ថុតាងខាងលើ ត្រូវបានសមត្ថកិច្ចនាំមកកាន់ស្នងការដ្ឋាននគរបាលខេត្តកំពង់ចាម ដើម្បីសាកសួរ និងកសាងសំណុំរឿងតាមនីតិវិធី តាមបញ្ជារបស់លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម ៕
ចំនួនអ្នកទស្សនា
- ថ្ងៃនេះ3861
- ម្សិលមិញ15681
- សប្តាហ៍នេះ62701
- ខែនេះ84581
- ឆ្នាំនេះ84581
- សរុប20527037